कुहिरो कहिले हट्यो ?

Photo by : Karol Wiśniewski from Pexels

हुन्न हुन्न एकछिन रोकिनुहोस । यो तपाई के गर्दै हुनुहुन्छ ? यसरी अर्काको कोठामा राती राती चियाउँनु राम्रो हो ? के तपाईको संस्कार यही हो ? हो मैले तपाईहरूलाईनै भनेको,जो यो कथा पढ्दै हुनुहुन्छ । म अब यहाँ एउटा केटाको कोठाको झ्यालबाट भित्र चियाउँदै छु । तपाईहरूलाई यदि यो गलत लाग्छ भने अहिल्यै पढ्न छोड्नुहोस् नत्र भए ढिलाई नगरीकन मसँगै चियाउनुहोस् । 

अलिक बचेर हेरौ है, उसले यसरी कसैले उसको कोठामा चियाएको थाहा पायो भने बबाल हुन्छ फेरी । हामीले अहिले चियाउँन लागेको कोठा बसन्तको हो,बसन्त प्रहरीको हलदार हो । अझै पनि चियाउँनु हुन्छ यो कोठामा ? अब प्रहरी भनेर डराएर चियाउन छोड्ने बाहेक अरू म सँग चियाउँनु होला ।

कोठा अन्धकार छ , पूर्णीमा भएकाले बाहिर मज्जाले जून लागेको छ, । उसको कोठाको पूर्व फर्केको झ्यालको पर्दा खुल्लै छ ,  प्रायजसो पूर्णीमाको रात ऊ झ्यालको पर्दा खोलेरै सुत्ने गर्छ । थाहा छैन किन यसो गर्छ, सायद उसलाई जूनको उज्यालो मन पर्छ । पुषको महिना छ त्यसैले थर्मोकोट र सुरूवाल लगाएर सुतेको होला । यो कथालाई एटीन प्लस सम्झेर यहाँ सम्म आउनु भएकाले पनि यहाँ मेरो साथ छोड्न सक्नुहुनेछ, नछोड्नेहरू भनेँ मिसन चियाइमा मेरो साथ दिनुहोला ।

बसन्त हरेक वर्ष एक पल्ट पूर्णीमाको रात अनौठो सपना देख्छ , अनि सपनामै हिड्छ, नपत्याए हेर्नुहोस त उभीएर कोठाको भित्तामा एकोहोरो हेरि रहेको मान्छे बसन्तनै हो । अलिक ध्यान दिएर हेर्नुहोस है अध्यारो छ ठम्याउँन गाह्रो पर्ला । बसन्तले परार पूर्णीमाको रात एउटा अनौठो सपना देखेको थियो । सपनामा ऊ कुनै युद्ध लडिरहेको थियो, हातमा उसको खुकुरी थियो अनि मनमा डर । बैरी माथि खुकुरी चलाउँनु पर्ने मान्छे सपनामा हात कमाएर बसेको थियो । त्यतीकैमा भग्वान कृष्ण त्यहाँ आएर भने थुक्क गोर्खाली लाज लाग्दैन तँलाई ? सैनिकको छोरो भएर के गरेको यस्तो, तेरो साथीहरूको टाउकोको गिड भुइँमा खस्दा सम्म तँलाई हिम्मत आउँदैन ? थुक्क लाछी जा बरू तेरो टाउको पनि थापिदे उनीहरूको तरबारमा । गोर्खालीको इज्जत माटोमा मिलाउँनु भन्दा बरू तँ माटोमा मिलेको बेस । भग्वानले यती भनेपछि भने उसको रगत तातेको थियो । अनि राता आँखा पारेर उसले भग्वानलाई भनेको थियो, हे प्रभू मलाई शक्ति दिनुहोस कि म यी सबैको लासबाट गुज्रेर गोर्खालीको इज्जत बचाउँन सकूँ । भग्वान कृष्णले यति कुरा सुनेर उसको टाउकोमा हात राखेर भन्नुभएको थियो, जा गोर्खाली जितेर आइज , तेरो जिवन अब तेरो हैन देशको भयो । त्यस्को भोलीपल्ट उसले प्रहरीको हलदार पदका लागि निवेदन दिएको थियो । उसलाई लाग्छ पूर्णीमाको रात देखेको सपनाले उसको बास्तबिक जिवनको बाटो देखाउँछ ।

अझ पोहोरको त के कुरा गर्नु , सपनामा उसले एउटा बुढो पानवालासँग गफ गरिरहेको थियो । अनि पान खाँदै कुरा गर्दा थाहा पाएको थियो कि पानवालाको छिमेकमा चोरी भएको रहेछ । पानवाला सँग गफ गर्दा गर्दै त्यही पसलमा एउटा भर्खरको केटो आयो र भन्यो बुढा मिठा पान लेउ । त्यो केटाले केही बेर त्यही उभीएर पान खायो अनि पैसा नतिरी हिड्यो । पानवालाले रून्चे अनुहार लगाएर उसलाइ भन्यो यो मान्छे त फटाहा छ बाबु अस्ति एकपल्ट पान खाएको पैसा माग्दा मेरो कठालो समायो , मलाई त पैसा माग्न पनि डर लाग्छ । त्यस्कै भोलीपल्ट उसको थानामा एउटा चोरीको केस दर्ता भएको थियो, चोरीको अनुगमन गर्न चोरी भएको ठाँउ पुग्दा ऊ छक्क परेको थियो । चोरी भएको घर ठ्याक्कै अगाडि एउटा बूढो मान्छे पान बेचिरहेको थियो । 

आज पनि बसन्त सपना देखिरहेको छ । कुहिरो लागेको बिहान बसन्त एक्लै हिडिँरहेको छ ,एक हात पर सम्म पनि नदेखिने कुहिरो लागेको छ । त्यस्तैमा एउटा केटीको आवाज आउँछ , हेलो कोही हुनुहुन्छ ? बसन्तले बदलामा आवाज दिन्छ , हजुर म पनि केही देखिरहेको छैन । उताबाट फेरी आवाज आउँछ तपाँई कता हुनुहुन्छ ? आवाज आएको ठाँउ पहिल्याउँन ध्यान दिएर सुन्दै बसन्त भन्छ, खै कता भनौ, म कहाँ छु त थाहा छैन, तपाई कता हुनुहुन्छ ?

एकछिन पर्खन्छ आवाज आउँछ कि भनेर, कोही नबोलेपछि सोच्छ पक्कै पनि त्यो केटी टाँढा गइसकेको हुनुपर्छ, । त्यसैले केही नबोली अगाडि बढी रहन्छ । केही बेर हिँडेपछि , कुहिरो पुरै हराएर सफा कालोपत्रे बाटो उसको अगाडि देखा पर्छ, बाटोको दाँया र बाँया पर पर आँखाले भ्याउन्जेल सम्मको खेत छ । पछाडि फर्कैर हेर्छ त्यो केटी देखिन्छे भन्ने आशामा तर बाटो पछाडि पनि अगाडिझै खालीनै हुन्छ । सोच्छ त्यो कुहिरो कति बेला हरायो ? अनि किन मैले देखिन हराएको ? अघि देखी म कतिबेला पातलिएला कुहिरो भनेर पर्खीरहेको थिए , ध्यान पनि दिएकै हो, थाहै नदिइ कसरी पो हरायो कुहिरो ? अचम्म भयो यो त । 

भागौ भागौ अब बसन्तलाई निद्राले छोड्ला जस्तो छ, मैले उसको जिउमा हलचल देखेँ । बेलामा भागेन भने भोली फेरी हाम्रो बास प्रहरी चौकीमा हुनेछ । अब आआफ्नै घर जाऔँ , यसरी अर्काको कोठामा चियाउँनु राम्रो पनि त होइन । होइन र ?

किन पर्खनुभएको तपाईहरू ? जेल जाने नै बिचार छ कि के हो ? ए ए बुझेँ, भोली उसको जिवनमा के घटना घट्छ भनेर बुझ्न खोज्नुभएको हो ?

हो भनेँ सुन्नुहोस : उसको जिवनमा भोली एउटा यस्तो घटना घट्छ जो तपाई र मैले थाहा पाउनेछौ तर बसन्तले थाहा पाउँनेछैन । उसले भोलीबाट आफ्नो प्रेमिकालाई बिर्सनेछ । यदी पत्याउँनुहुन्न मेरो कुरा भने कुनै दिन उसलाई भेट्दा सोध्नुहोला , तिमीले कुन दिन आफ्नो प्रेमिकालाई बिर्सिएका थियौ ? त्यस बखत हेर्नुहोला उसको मुहारमा त्यही भाव नाँच्नेछ जुन सपनामा कुहिरो हराएर छक्क पर्दा उसको मुहारमा नाँचेको थियो ।

- बिजय लुईटेल