ह्याप्पी भेटघाट एनिभर्सरी

Photo by : Giftpundits.com from pexels

आज ठ्याक्कै एक बर्ष भएछ, पहिलो नजरमा माया बसेको । साथीको घर, पाहुना कोठा, म सोफामा बसेर चुनाबको गफ लगाउँदै थिए, तिमी ओछ्यानमा पल्टेर मोबाइल चलाउँदै थियौ, थोरै डन्डीफोर आएको मुहार, मुस्काउँदा मज्जाले देखिने दाँत , छोडेको कपाल , म गफ गर्दै, सबैको आँखाबाट बच्दै तिमीलाई हेर्दै थिए । मलाई बोलौझै लागिरहेको थियो तिमीसँग तर सकिरहेको थिइन । सकौ पनि कसरी सबैको अगाडि, त्यो पनि तिम्रा आफन्त । मलाई कोही केटी देख्दा यस्तो पनि हुन्छ भन्ने थाहै थिएन । हिजै जस्तो लाग्छ मैले घर आएर तिम्रो यादमा कविता लेखेको तर एक बर्ष भैसकेछ । मलाई मज्जाले याद छ घर आउँने बित्तीकै साथीको फेसबुक प्रोफाइल खोलेर उसको फ्रेन्डलिस्टमा तिम्रो मुहार खोजेको तर भेटे पछि पनि रिक्वेस्ट पठाउँन आँट नआएको , आजै देखेको रिक्वेस्ट पठाएछ कस्तो केटो रहेछ भन्छौ भन्ने डरले रात काटेको । भोली पल्टचै मन थामिएन औलाले पनि धैर्य त्यागे अनि सुरु भयो प्रेमको नौलो अनुभव जो सँग म परिचीत थिइन । आज ठ्याक्कै एक बर्ष भएछ मैले तिमीलाई मनपराएको , तिमीले मलाई मनपराएको ।

गाडीको झ्यालमा म टोलाइरहेको छु , तराईको फाट छ , तेज रफ्तारमा गाडी गुडिरहेको छ, रुख बिरुवा घर, हावा सबै पछि छुट्दैछन् , पछाडि छुटेका सबै कुराले मलाई तिमी सम्झाउँदै छन् । तिमी पनि त यसरीनै छुट्यौ नि कतै ,कहाँ छुटछु पनि नभनीकन , भनेकी भए सायद म मेरो समयको गाडीलाई ब्रेक लाएर तिमीलाई हात दिन्थेँ । अगाडि आउने सबै कुरा पनि मलाई तिमी सम्झाउँछन् , लाग्छ कतै फेरी भेट हुन लेखेको छ , जीवनको कुनै स्टेसनमा तिमी मलाई पखिरहेकी हुन्छौ , मैले तिमीलाई छोडेको रिस मनमा लिएर, म बिस्तारै तिम्रो नजिक आउँछु, तिमी अर्को तिर फर्कन्छौ, धेरै बेर लाएर म तिमीलाई फकाउँछु अनि तिम्रा झोला उठाँउछु, गाडीमा तिमीलाई बसाँउछु,, जान्छौ हामी फेरी हामीलाई जिउँन । आज ठ्याक्कै एक बर्ष भएछ एक्लै भन्दा तिमी सँग जिउन सजिलो हुन्छ भन्ने महसुस भएको ।

मलाई बोली रहने मन हुन्थ्यो, के छ, कस्तो छ सोध्ने मन हुन्थ्यो । मलाई म तिमी सँग बोलेर थाकेको थाहा छैन , तिमी सायद थाक्यौ । अब त म एक्लै बोल्दा बोल्दै थाकेको छु, तिमीलाई आराम पुगेको भए भन मलाई एक छिन तिमीलाई सुन्ने रहर छ । थाहा त होस मैले के छुटाए । आज ठ्याक्कै एक बर्ष भएछ तिम्रो मुहारमा त्यो हाँसो सधै ल्याइ रहन सक्छु जस्तो लागेको ।

खाना खाने ठाँउमा गाडी रोकिन्छ , मलाई तिमी टाडा हुदाँ मैले न्यास्रो लागेर छोडेको छाक याद आउँछ । मैले तिमीलाई जति सम्झिए, त्यो भन्दा बढी तिमीले मलाई बिर्सियौ, मैले तिमीमा जति डुब्न खोजे तिमी उतीनै सुक्दै गयौ, कहिले आउँछौँ त तिमी मिलेर केही याद बनाउँ भन्दै ? आज ठ्याक्कै एक बर्ष भएछ मैले तिम्रो हात समाएर हिडेँ भने हजार मायलको बाटो एकैछिनमा पार गर्छु जस्तो लागेको ।

कहिले काँही लाग्छ कोही मलाई भित्रबाट बोलाउँछ र सोध्छ तिम्रो बारेमा , मलाई तिम्रो कहानी सुनाउनु छ म भित्रको त्यो आवाजलाई । त्यो कहानी लिएर कहिले आउँछौ त तिमी ? कि भनिदिउँ म भित्रको आवाजलाई लाटो भैदिनु भनेर ? आज ठ्याक्कै एक बर्ष भएछ मलाई अब खुसीको कमि हुन्न जस्तो लागेको ।

चिया खान झरौ है भन्दै खलासी दाइ कराउदा मलाई हामीले सँगै खाएको दुई कप चियाको याद आउँछ । हतार हतारमा खाएको चियाले छोडेको लामो सम्झना , याद आउँछ । कहिले आउछौ त तिमी समय निकालेर मलाई एक कप जुठो चिया खुवाउनलाई ? आज ठ्याक्कै एक बर्ष भएछ मलाई तिमी र म हामी होँ जस्तो लागेको ।

हिजै जस्तो लाग्छ, तिम्रो स्कुलमा भर्ना भएको तिमीलाई पढ्न , आज म तिमीमा फेल भएको छु,। यो परिश्रमी छात्रलाई के पुन भर्ना गर्न सक्छौँ त तिमी ? कहिले आउँछौ त मलाई नयाँ कपडा सिलाउ सेसन सुरु हुन आट्यो भन्दै ? आज ठ्याक्कै एक बर्ष भएछ तिम्रो आँखामा आँखा जुधाएर म संसार हेर्न सक्छु जस्तो लागेको ।

झर्ने बेलामा खलासी दाइले आफ्नो बहुमुल्य सामानको सुरक्षा आँफै गर्नु होला भन्दा मैले अन्जानमा हराएको हाम्रो माया याद आउँछ । ती खुसीका खजाना लिएर तिमी कहिले आउँछौ ? कि म भनिदिउँ आँफैलाई अब ती खजाना खिएर गए लाउन योग्य छैन भनेर ? त्यसो भन्दा फेरी तिम्रो हात समाउन नपाएर खजाना भन्दा बढी खिया लागेका हात नरिसाउलान् ? आज ठ्याक्कै एक बर्ष भएछ मेरो पनि माया बस्यो भन्ने बिश्वास लागेको ।

जे जस्तो होस खल्लो या चकिलो माया यसै मिठो उसै मिठो हुँदो रहेछ । माया त खुसी हो, अनि खुसीमा म के गुनासो गर्नु र मलाई त तिम्रो आमाले तिमीलाई अरुको नजरबाट बचाँउन तिम्रो निधारमा लगाईदिने त्यो कालो टिका सँग गुनासो छ, जाउँ तिम्रो आमालाई भनिदेउ कसैले यहँी टिकामा आँखा लाको पनि आज ठ्याक्कै एक बर्ष भएछ । 

( गाडीको हर्नले मलाई तन्द्राबाट ब्युझाउँछ, यसो हेर्छु आमा अर्को सिटमा ढल्कीरहनु भएको छ , साँझ पर्न आटेको छ । म गोजीबाट इयरफोन झिक्छु , कानमा लगाउँछु अनि बज्छ नारायण गोपाल र ज्ञानु राणाको ,मान्छेको माया यहाँ खोलको पानी जस्तो किनारालाई छोइ भाग्ने लहरको बानी जस्तो ,,,,,,,,,,,,,,,,,,,,,,,,,,,,,, मान्छेको माया यहाँ आँखाको नानी जस्तो यो रातलाई भगाई आउने सुन्दर बिहानी जस्तो । मनले कोरस गुनगुनाइ रहन्छ आज ठ्याक्कै एक बर्ष भएछ मैले उसलाई मन पराएको , उसले मलाई मन पराएको । मान्छेको माया यहाँ ,,,,,,,,,,,,,,,,,,,,,,,,,,,,,,,,,,,, )

        बिजय लुईटेल